«Ճանապարհորդություն առողջ սննդի տիեզերքում»՝ Զառիթափից Եղեգնաձոր

Վայոց ձորի մարզի Զառիթափի միջնակարգ դպրոցի թատերական խմբակի սաները շրջում են դպրոցից դպրոց ու հասակակիցներին իրենց հետ տեղափոխում առողջ սննդի տիեզերք։ Հերթն այս անգամ  Եղեգնաձորի թիվ 1 հիմնական դպրոցինն էր։ 

Նրանք արդեն հասցրել են հավաքել ներկայացումների պատկառելի կենսագրություն՝ բեմադրելով «Ճանապարհորդություն առողջ սննդի տիեզերքում» ներկայացումը մարզի տարբեր դպրոցներում: Այս անգամ բեմադրությունը Եղեգնաձորի թիվ 1 հիմնական դպրոցի դահլիճ էր բերել Եղեգնաձոր քաղաքի երկու դպրոցների 1-4 րդ դասարանի  160 աշակերտներին և թիվ 5 մանկապարտեզի ավագ խմբի 35 երեխաներին։ 

 Ներկայացումը, որի մասին մարզում շատերն են արդեն հասցրել լսել, ումանք՝ նաև մասնակցել, «Դպրոցական սնունդ և երեխաների բարեկեցություն» հիմնարկի նախաձեռնությունն է՝ ինտերակտիվ թատերական ներկայացման միջոցով հանրայնացնել առողջ սննդի և առողջ ապրելակերպի գաղափարախոսությունը։  «Փոփոխությունների թատրոն» հասարակական կազմակերպության հետ համատեղ ստեղծված բեմականացումը նպատակ ունի երեխաներին հետաքրքիր և ներգրավող ձևով փոխանցել առողջ սնվելու կարևորությունը: Ներկայացումը դպրոցներում բեմադրում են թատերական խմբակների սաները՝ հիմնարկի տրամադրած սցենարի և ռեկվիզիտների օգնությամբ:  

Ներկայացման հիմքում ընկած է Անտուան դը Սենտ էքզյուպերիի «Փոքրիկ իշխանը» հեքիաթ-վիպակի գաղափարը, որին «Փոփոխությունների թատրոն»-ը հաղորդել է տիեզերական երանգներ: Սյուժեն պատմում է անփուշ դարձած կակտուսի մասին, որին օգնելու նպատակով հերոսները ճամփորդում են առողջ սննդի մոլորակներով՝ հավաքելով առողջ սնվելու խորհուրդներ: Ներկայացման ընթացքում երեխաները ոչ միայն հետևում են հերոսների արկածներին, այլև ակտիվորեն մասնակցում են՝ օգնելով հավաքել առողջ մթերքներ կակտուսի համար և քվեարկելով տարբեր մթերքների օգտին: 

Եղեգնաձորի թիվ մեկում տեղի ունեցած ներկայացումը, ինչպես ամեն դպրոցում, այստեղ էլ դարձավ իսկական տոն երեխաների համար, ովքեր ոգևորված հետևում էին հերոսների արկածներին և ակտիվորեն մասնակցում ներկայացման ինտերակտիվ հատվածներին: 

Նախաձեռնությունը կյանքի է կոչվել «Դպրոցական սնունդ և երեխաների բարեկեցություն» հիմնարկի աջակցությամբ, որը տրամադրել է ինչպես ներկայացման սցենարը, այնպես էլ բեմադրության համար անհրաժեշտ ռեկվիզիտները։ Հիմնարկը նաև թատերական խմբակին մասնագիտական խորհրդատվություն է ապահովել՝ և՛ առկա ձևաչափով, և՛ հեռավար՝ ներկայացումների փորձերի ընթացքում։ 

Մինչ օրս «Ճանապարհորդություն առողջ սննդի տիեզերքում» ներկայացումը զառիթափցի  փոքրիկ էնտուզիաստների կողմից արդեն պրոֆեսիոնալ խումբը բեմադրվել է 10 անգամ, ունեցել 390 մեծուփոքր հանդիսատես։ Եղեգնաձորի թիվ 1 հիմնական դպրոցում ներկայացումը ևս մեկ ճամփորդություն էր՝ դեպի առողջ սննդի գունեղ ու համեղ տիեզերք։  Զառիթափցիների  փորձն է ցույց տալիս՝ երեխաների ձեռքերով ստեղծված ներկայացումները կարող են լինել նույնքան ազդեցիկ և արդյունավետ, որքան պրոֆեսիոնալ թատերախմբերի կողմից բեմադրվածները: Երեխաները կարող են լինել ոչ միայն տեղեկատվության ստացողներ, այլև դրա փոխանցողները՝ դառնալով առողջ ապրելակերպի իսկական դեսպաններ: